“Auguri e mònitu pi lu Natali a Caniattì”, poesia di PEPPECARUSO

          

             “Auguri e mònitu pi lu Natali a Caniattì”

                            di peppecaruso

Anchi chist’annu arrìvanu li Festi di Natali
e cuminciammu a marturiàrini la menti:
«Pipìu? Cuesti e sansizza? Cosi dunci e li rigali?»
Scurdànnuni a cu di tutti ‘ssi cosi ‘un n’havi nenti.

Pi li Cristiani chissu è lu tiempu ca nasci lu Signuri:
lu sfarzu, ca è prufanu, a lu sacru fa custioni.
Lu Bamminu avìa vicinu sulu quarchi pòviru pasturi
muertu di fami. Antru ca schiticchi e lu viglioni!

A la tivvù n’avvìsanu ca c’è crisi;
ognunu dici: «Ma a ‘ssa cosa sulu ju ci haiu a pinsari?
Accamora m’addiviertu ni ‘ssu misi,
e doppu li Tri Re ‘ncumienciu a sparagnari.»

Picciuetti mia, ju la piensu ni ‘ssu modu:
«Cu havi e cu nun havi, assittati ni la stessa tavulata,
mangiammu tutti, ma cchiù picca, sucannu anchi lu brodu
e pi lu Fistiggiatu ‘ssu rigalu è cosa grata!»

Ora m’attocca di finiri ‘ssa canzuna:
cu l’Auguriu di passarivilla tutti bona,
stringiu li manu forti a una a una,
a li Caniattinisi residenti e a chiddri fora zona!

Dicembre 2008