PEPPECARUSO.CANICATTÌ: “Panta rei” (…e li jorna passanu). Poesia

 UNA POESIA IN DIALETTO CANICATTINESE DI PEPPECARUSO

CANICATTÌ: “Panta rei” (…e li jorna passanu)
di peppecaruso

È Nuvièmmiru e mangiammu li castagni
ni stu paìsi unni si cogli racina.
Quantu âmm’ a aspittari pi livari li magagni
e RIFARI di Caniattì ‘na beddra cittadina?

Passaru li Muerti e ora veni San Martinu.
Dipua? Li muffuletta a la ‘Mmaculata!
Lu juernu di Natali ‘ncumència lu fistinu
e siemmu sempri ASSITTATI NI LA TAVULATA!

Però cuemu è e cuemu nun è… passà ‘n-antr’annu.
Si cangiaru li cosi? Nun si vidi!
Ci manca sulu, ca quarcunu jetta lu bannu
a ‘mmitarini d’aviri ancora fidi!

Fidi d’aspittari ‘n’antra tanticchia,
ca prima o po’ ritorna Primavera,
ma doppu la Pasqua! (già mi frisca ‘ntra ‘na gricchia)
Pirchì ni la ‘stati ni jammu tutti ‘n-crucera!
NOVEMBRE 2008