Una poesia di peppecaruso

3 agosto 2008 t.sociale 2X di ilpuntoduearci

VICENNA TEATRALI DI LU TEATRU SOCIALI
di peppecaruso

A la fini di lu Millieottucientu
Caniattì era già un granni paisi,
spitala, scoli e ‘ndustrii a cientu a cientu
e ni l’economia tanti erano burgisi.

‘Ncuminciammu ad annacàrini a la Chiazza,
tutt’a ‘na vota si parlava di Curtura:
Jachinu La Lumia, Ninu Sciascia e lu Vìspicu La Vecchia
èranu razza,
ca lusciu dàvanu, a lu paisi, fora li mura.

“Ora ca siemmu un veru granni paisi,
Chi putiemmu fari?”, dìcinu l’Amministratura.
Ceeeeeeeee!… Un Teatru! Ci voli… quarchi misi!
Po’ lu jinchiemmu di nobili e duttura!

Unni si fa pi èssiri perfettu?
A banna vascia di la Chiesa di lu Càrminu!
Beni! Lu prugettu a genti eminenti (Tabassu e Sciascia…):
passaru anni e nun si fici nenti!

Doppu vint’anni lu sèculu cangià;
Allura, pi ddru maistusu prugettu,
datu ca Caniattì Teatru nun à,
si pinsà, di la Sicilia, a lu miegliu Architettu.
Si chiamava Ernestu Basile, figliu di Giambattista
ca progettà lu “Massimu” palermitanu,
qualificatu era un granni artista,
‘n tutta la Sicilia e anchi cchiù luntanu.

Comu fu e comu nun fu doppu quarchi annu,
quasi cent’anni fa, fu inauguratu:
finiemmu di pàtiri chiddr’affannu,
di nun aviri un Teatru edificatu.

Lu chiamaru Sociali pirchì a ddri tiempi
la Socialità avìa a èssiri Suvrana;
pi mangiari si zappava cu suduri e stenti,
a lu Teatru jiva sulu quarchi figliu di Gran Dama.

Oj, ni lu Dumilaottu, mi capità
di circari la storia di ssu monumentu.
Comu finì doppu l’inaugurazioni?
Ci jeru genti o è farsa opinioni

ca era sempri chinu prima di scuppiari,
ni lu quattordici, la Guerra Mondiali?
Si ferma tuttu e - ora c’ âmm’a fari? -
jammu sùbitu a pigliàrini lu Piavi!

L’unica nutizia ca ‘n-testa m’arristà,
fu ca la Abba cu la Cumpagnia di Pirandellu,
ni lu Vintisetti, li “Sei Pirsunaggi” recità,
ma sapìrinni di cchiù, pi mìa, è un gran… macellu!

Ci fu poi lu Secunnu Conflittu,
chiujemmu ancora li divirtimienti;
passaru deci anni di fami e di lamienti,
e lu Teatru doppu… “Cìmina” fu dittu!

Accussì pi quarchi annu funzionà;
e quasi cinquant’anni fa si dicidì
(ni la mà testa quarchi cosa m’arristà):
“Non fàcciasi Tiatro mai più a Caniattì”.

Dicu Teatru comu costruzioni,
pirchì teatru e curtigliu sempri c’è
ni ssu paisi unni pi ogni opinioni -
tinta o bona- : “SI DEVE FARE COME PIACE A ME!”

E comu finì cu Tabassu e lu Basili?
E Marta Abba e Luvici Pirandellu?
E li Sei Pirsunaggi ‘n-cerca d’Auturi?
Càvulu! Prèganu ancora, firventi, lu Signuri!

Ora mi dìssiru ca lu stannu grapiennu;
fu ristauratu e sacciu propriu beni,
ma quannu, Caniattinisi, ni vidiemmu tutti ddrà?
FORSI LU JUERNU CA NUN VENI MA’!

Ottobre 2008