OMAGGIO ad ANGELO LA VECCHIA,di Peppe Caruso

OMAGGIO ad ANGELO LA VECCHIA

 “ CANIATTINISI: Ricurdammunni lu Passatu! ”

di Peppe Caruso

 

Mi dissiru cà nà vota c’era lu Parnasu,

nun è lu Munti unni stavanu li Musi,

ma ’na beddra “fazzulittata” di nuesci paisani,

c’addivirtiennusi dicianu cosi astrùsi.

 

Liggivu di Don Ciciu Prisidenti,

pi’ tutta la vita natural duranti,

unicu Omu di l’Umanità,

ca chiddra carrica ‘ncielu si purtà.

 

Doppu la sò dunci dipartita,

li Arcadi si riunianu senza far casu

a l’assenza fisica di Ciciu,

pirchì iddru, di Ddrassùsu, dirigìa sempri lu Parnasu.

 

Liggivu di Patri Decu e di Sapienza,

cà di lu parrinu era pirsunali Scecca,

beddra, arguta e ‘ntilligenti era videmma,

tantu cà di lu Parnasu divintà lu Stemma.

 

C’ammaddìri di Totu Sanmartinu,

granni Abbucatu di lu Foru di Palermu,

fu lu Massimu Espunenti e non pir casu,

“ Viaggiaturi-Chiazzista del  Parnasu ”.

 

Lu juernu cà lu eliggieru a lu Sinatu,

ci scrissi Patri Decu sbarattatu:

<< Lu Viaggiaturi-Chiazzista del  Parnasu,

a Sinaturi è statu digradatu ? >>

 

N’antru Gran Tipu fu Ciciu Macalusu,

cà cuemu pueta era Fra Neccolò Musasca,

li so puisii nun finieru nnì . . .  lu pirtusu,

ma girmoglianu, ancora di la cultura, nnì la grasta.

 

Scrissi financu cà lu sceccu è sceccu,

quannu è nicu, granni e quannu mori,

e soprattutto, d’essiri sceccu, manteni la parola,

cosa cà , Omu ‘Mpurtanti, spessu ignori.

 

Di Sacheli, Trupia, Grecu e Cigna picca sacciu,

nun è pi offisa si sulu Li citu,

la mà ‘gnuranza ora mi è d’impacciu,

e pì la vriogna mi sientu allibìtu.

 

Peppipaci fu lu Lìderri tra tutti,

facìa lu sartu, di chiddri bueni, pir mistieri,

perciò tila e vistita cu la fuerficia tagliava,

ma cu la so pinna di pueta nuddru l’eguagliava.

 

Sacciu cà fu Arcadi lu Baruni

Ustinu La Lumia, di mia citatu,

mi veni ’mmenti ora la sò ‘mpigna: cù la sò varba e lu sò vastuni,

Omu di stranizza Gran Campiuni.

 

Lassami lagnusia, Antri ricuerdu !

Sunnu chiddri cà canuscivu di pirsuna,

Pietru Cannianu, Peppi Alaimu, Angilu La Vecchia,

cà li Musi spidaru ad una ad una.

Cù Don Curtu, Chissi Trì a mia traghittaru,

la passioni pi’ Caniattì nuesciu paisi,

quarchi vota cirivieddru e pinna s’appattaru,

e ci fueru jorna cà a scriviri mi misi.

 

Pir carità nun faciemmu paraguna,

tra tutti Li Citati e lu scriventi,

Chiddri di Curtura eranu Campiuna,

ju ‘mmeci sacciu di nun sapiri Nenti !

 

Nni stì jorna è lu dicinnali,

cà lu Prefessuri, Rigista e Scritturi,

l’Angilu La Vecchia ‘ncielu misi l’Ali,

e ju scrissi ssì cosi pi riennicci l’Unuri !

 

POSTI SCRIPPITÚMMI pi li Caniattinisi,

speciarmenti pi la . . . Classi Dirigenti:

<< Nun trascurati la Storia di lu Nuesciu Paisi,

sinnò  ju,  Peppicarusu, nun ci haiu caputu nenti! >>

 

Canicattì 09 Settembre 2008