Ma nannu (classi 1889). Poesia di Totò Treppiedi

*

Ma nannu (classi 1889) 

Papà Caliddru Picuni , era ma nannu pi parti di ma matri,
già a deci anni, era in funnu a la minera a scavari surfaru e petri,
avia nasciutu a Racarmutu, paisi di genti massara e di salinari
scarsizza, casa, famiglia, figli abbunnati , l’unicu svagu lu travagliari.

Era immirutu e taliannu accruccatu nterra, truvava sempri tanti cosi
un piezzu di rumanieddru, deci liri, miezzu lapis, un nastru pi rosi.
Avìa na guaddrara accussì granni, ca a talialla parìa un miluni,
la prima vota ca la vitti pinnuliari, mi pigliavu veru un granni sbungiuni.

Si marità carusu ,di sabatu, accussì a lu travagliu nun avissi mancatu,
lu biancu vistitu di la spusina e l’anieddru pi lu ritu, ci l’avianu mpristatu,
la duminica, lu viaggiu di nozzi intra na paglialora, si “mangiaru li maccarruna”
lu luni cu la citalena, picu e pala, turnà a rumpisi li chianchi ni li cavirnuna.

Iu di nicarieddru nvrazza a iddru, ascuntava anchi milli voti li so cunti,
parìa capìri ca di granni avissiru divintatu, di la ma vita li funnamenti.
quantu sangu, fami e friddu ni la granni guerra ncapu la Bainsizza, potti patìri
ni lu fangu di li trincei, aspittannu l’attaccu, cu lu scantu sempri di putiri muriri.

Anarfabeta nun sapìa nè leggiri né scriviri, ma la sò semplicità era la sò forza,
forza di patimienti, dulura e fami, ca fannu granni li sintimienti e dura la scorza.
Oi tuttu è cunsumismu firmatu, na vita china di fimmini cu la vucca e li minni rifatti,
d’intra siemmu vacanti, a la ricerca di na filicità can un c’è, aviemmu sulu li cori sfatti.

 Febbraio 2010

                                                                Totò Treppiedi.

*Gli Zolfatari 50x60 

di Concetto Mendola

fonte: http://augustapittorica.blogspot.com/