TOTO' TRAPPIEDI. "Lu Cumannari è miegliu di lu futtiri" (.Poesia in dialetto canicattinese)

Lu Cumannari è miegliu di lu futtiri.

Chistu nzina a ieri l’anticu saggiu ni tramannava,
smintutu da du Cavalera ca du picciuna pigliaru cu na fava.
Di l’urtimu si parla comu di un Politicu d’anta statura,
ma ntantu fici Ministru un nanu, pi fari bbona figura.

Si fa li liggi a sò immagini e sumiglianza, comu fussi intra n’iddru
e cu lu votu di fiducia nuddru s’azzarda a smoviri un capiddru,
grazi a sta liggi elettorali nun cunta né lu populu né li cittadini
ma iddru manna in Parlamentu, li sò avvocati, autisti, nani e concubini.

Na vota dissi lu “Bonarma” “Farò del Parlamento na staddra pi cavaddra”
anchi iddru cumanna cu lu nierbu l’anorevoli, comu fussiru puddriddra.
Ni stramma di minni e culi cu li sò tilivisioni, mentri chiossà iddru arricchisci
comu babbi taliammu nuantri senza capiri, si siemmu divintati carni o pisci.

La verità è sulu ca siemmu tutti d’intellettu e di sacchetta cchiù scarsi,
a la muta e a la surda ni privatizzaru nzina l’acqua pi biviri e pi lavarsi,
pi livarini anchi l’aria c’è tiempu finu a la prossima liggi decretu,
accussì nun sintiemmu cchiù tuttu stu tanfu e tuttu stu fietu.
Innaru 20010 Totò Treppiedi
Pag.55