Li regionali di lu 2008 e la banda di li trummati.Poesia di T.Treppiedi

Li regionali di lu 2008 e la banda di li trummati.

Li urtimi elezioni regiunali / di lu dumila e ottu
li candidati caniattinisi / ficiru tonfu cu lu bottu
chiddri ca appizzavanu / manifesti cchiù abbunnati
arristaru cu na pezza nculu, / curnuti e vastuniati.

La cosa assai curiusa / ca eranu tutti accallanati
facivanu campagna / comu a li supermercati
cu li offerti speciali / 50 euri ogni tri voti
grana ca pi fallimientu / nun furunu cchiù dati.

Chistu era lu pattu / cu zingari e gintuzza scarsa
usannu la pulitica / cchiù peggiu di na farsa
nun mi fazzu miraviglia / di cu si vinnì ppi fami
ma di li galantuomini / ca fannu sti gesti nfami.

Li furstieri appiru successu / e quarchi furtunatu
comu gaddrina “scaliava”/ ni li voti di lu cugnatu
pi jiri a monticitoriu / bastava essiri numinatu
accussì li voti attuccaru / a ccu l’avia ereditatu.

Lummardu ca nun è sceccu / ma spertu e nturciuniatu
sapìa ca li listi d’appoggiu / avissiru fallutu
ma sirviva sulu purtari / acqua a lu so mulinu
lassannu nmucca un uessu / a quarchi poviru mischinu.

Granni battaglia fiera si fici / “conquista di l’autonomia”
la stessa ca da sissant’anni / già sta Sicilia avìa
iddri l’hannu guvirnatu / su sempri li stessi genti
si cangianu e si stracangianu / cunfunniennu li menti.

Ci sunnu sempri li figliuezzi di Gioia e Cianciminu
o s’ammuccianu darriè a don Sturzu / li niputi di Manninu
cangianu bannera e partitu / vontanu la foglia
lassannu sta povera terra / nuda, cruda e spoglia.

Caniattì Aprili 2008

Totò Treppiedi